skip to main |
skip to sidebar
|
الجمعة، جانفي 02، 2009
|
|
التدوينه هاذي تجي تفاعلا مع جملة الملاحظات اللي وردو في تدوينة عمروش فيما يخص تدوينة الشيخ قاسم الغنّوشي في البداية ، عندي تحفّظ صغير يا عمروش على جملتك الاولى .. على خاطر ربما اكون اكثر رجاحة عقل من البعض .. لكن الاكيد انّو هنالك من هو اكثر رجاحة عقل مني .. سواء في هذه المدونه او في الدنيا الكل
المدونات الجماعية من المفروض تكون عندها اهداف محددة و معيــّـنه مسبقا و الا فما الفرق بينها و بين المدونات العادية .. الشخصية ؟؟ و الا ، فما الغاية من بعثها ؟؟؟ ـ وجود الاختلاف بين المدونين المساهمين في المدونات الجماعية امر بقدر ماهو عادي وصحّي و حضاري و ضروري ، بقدر ماهو دقيق و خطير احيانا إن نحن خلطنا الامور ، و إن لم نلتزم بالاخلاقيات اللي من المفروض تكون هي الضابط العام لـْهالـتـّـجربة التدوينية الجماعية لكلّ منّا انتماؤو الفكري .. و ربما ... السياسي و حتى الحزبي و التنظيمي .. )أقول ربّما) . لكن من غير اللائق استغلال فضاء ملوّن و متعدد و غير متجانس باش تمارس انت ذاتيـّتك السياسية الضيقه اعتقد انّو اللي عجز على إثبات نضجو و تروّيه مع مجرّد مدونه جماعية ، و بدا يفركح في وسطها ، و ما نجحش في الالتزام بهالاخلاقيات هاذي ، و من يتحيّن الفرص ليمارس بطريقة "انقلابية" .. ومن لم يستطع إعطاء الامور حق قدرها ، لن يقدر مستقبلا على قيادة بلاد كامله .. فيها ما في هذه المدونه من اختلاف و تعدد و تلوّن و هنا مربط الفرس انا لا افصل تجربة تدوينيه بسيطه و ربّما غير ذات جدوى حاليا ، عن مشروع سياسي و حضاري و مجتمعي كامل .. كلنا نعرفو اللي هناك في السياسة ما يسمّى "برنامج العمل" ، و ما يسمّى "محاور الالتقاء" و ما يسمّى "تحالفات مرحلية" و ... و ... و تكون عادة مضبوطه و مشروطه بالالتزام بنقاط و بمحاور محدده .. دون العمل على البروز الذاتي على حساب المجموعه ، و أي إخلال بما وقع الاتفاق حولو ، قد يقود الى البعثرة و التهميش ، أو الى فكّ هذا الارتباط نهائيا و هاذا هو اللي وقع قد تقول لي مثل هذا الكلام يبدو اكبر من مجرد مدونه افتراضية صغيرة .. و انا اعود و اقول : لا ..لانّ الممارسه داخل هالمدونه الصغيرة في اعتقادي هي مرآة عاكسة لممارستك في بلاد كبيرة كلمة "حرية التعبير" ماهيش فاقونه واسعة حطّ فيها كل شي و لا يهمّك يا تشكّب على الناس و تنشر بياناتك الحزبية الضيقة ، و كي ياقع تنبيهك بحدودك و توقيفك عندها و تذكيرك بانك ماكش وحدك هنا ، تولّي تعمل ندّابه على حرية التعبير لا داخل مدونه جماعية ، حرية التعبير بيدها تاخذ منعرج آخر و تولي محصورة و وشروطه و عندها حدود و ضوابط من منّا لايستطيع نشر مقالات لجمال عبد الناصر و لكارل ماركس و لماوتسيتونغ و لصدّام حسين و لتروتسكي و للقذافي و للشابي و للغنّـوشــيـّات بانواعها و لحسن نصر الله ؟؟؟؟ ـ تقنيا .. و اعتمادا على المفهوم السطحي للحرية ، الجميع قادر على ذلك .. لكن التزامنا بالتوجه المحدد اللي انبنت عليه هذه المدونه ، يدعونا بل يفرض علينا الترفع على ذلك .. طالما انّو كل واحد فينا عندو فضاؤو الشخصي ينجم ينشر فيه مقالات و بيانات حتى لهتلر و لفرانكو و الا حتى للملكه رانيا :) ـ اللي تعتبرو انت زعيم و مرجع و تأتمر باوامرو و تقدّس بياناتو .. انا نعتبرو ابعد ما يكون على الممارسة المبدئية و الحضارية و نشوفلو رمز للتخلف و الانتهازية و حذاري من التخليط و التجليط وهنا نحب نربط شويّ و لو باقتضاب مع الاحداث الراهنه راهو موش كيما الاطار الخصوصي اللي يتحط فيه "الاسلام السياسي" في غزه ، و الجدل اللي صار حول ذلك ، و الاختلاف حول الاولويات ، و حول تحديد الاعداء الرئيسيين ، و اللي هو جدل راقي و ناضج و شرعي ، كيما "الاسلام السياسي" متاع لندن ، و متاع ناس ما عندها من السياسة كان : اعطونا نحكمو معاكم شوي ، باش ننصبو مشانق للكفار و زادا موش لانّو هناك من يرى انّو التصدّي لعدوان الصهاينه البشع على اطفال غزة بمباركة دوليه ، و التنديد بالمتخاذلين ممّن امتنعوا حتى على مدّ يد مساعدة خجوله ، أولى مرحليا من محاكمة الطرف السياسي الديني اللي يقود ، الموقف هاذا راهو ماهوش مدعاة باش تستغل فضاء تشترك فيه مع آخر مختلف لتمارس دعايتك الحزبية صحيح اللي نحن تو بكلنا قاعدين نشوفو في صورة دماء فلسطينية بألة دمار صهيونية ، لكن خلفية الصورة لا تخلو من دماء أخرى آتية .. دماء مختلفة .. مسيحية ربما .. لادينية ..المهم "كافرة" .. امّا بألة دمار صاحب البيان اللي وقع نشرو ، او المشابهين ليه ، في كامل انحاء العالم .. بما في ذلك غزة ثمّ انّو انا شخصيا عندي حساسية من لغة البيانات و تأليه الأشخاص حتى و إن كانو قراب لي فكريا .. و تقديس ما يقولونه حتى وإن كان بالضحالة بمكان ، كيما محتوى المقال المذكور ، و اللي يمكن يغري و يسحر و يأثّر على عديمي التجربة .. النافحين في الخطب الحماسية ، و يدغدغلهم مكبوتاتهم السياسية ، لكن ما اعتقدش انّو ينزل بردا و سلاما على من عاشر الناس هاذومه عن قرب .. بين اسوار الجامعات و في النقابات و حتى في الاحياء الشعبية .. وماهوش لا توّ .. لا هنا .. مجال لجرد هاك السجلّ اللي ماهوش هارب في الختام ، نحب نتوجه بدعوة ملحّه ليّ .. و للاصدقاء اللي انسحبو ، انهم يرجعو ، و للاصدقاء اللي مساهمين في هالمدونه الى اننا نكثّفو من التدوينات المحترمه و الملتزمه باهداف المدونه ، لانّو ربّما من اهم الاسباب اللي شجّعت قاسم الى نشر بيان حزبي ضيّق لشخص اقل ما نّـجّمو نقولو فيه : انو ما ثمّاش اتفاق لا على نزاهتو و لا على مبدئيتو ، هو الفراغ اللي تشكو منّو المدونه ، لانّو اعتقد انّو اذا احنا كنا انشط من هكّه و اكثف و اهمّ و اعمق تدوينــًـا ، ما كانش يلقى في روحو شجاعه للقيام بذلك ، لانّو باش يدرك لامحالة انّ نشر بيان كيف هكاكه باش يكون نشاز و كيما في الموسيقى ، النشاز ما يبانش "نشاز" الا داخل الاداء الملتزم باصول المقام ، لنساهم اكثر في إغناء المدونه بالمقالات الملتزمه بهدفها ، حتى نقضي على النشاز التدويني فيها |
|
عن:brastos
على الساعة
12:53
التسميات:
|
|
الاشتراك في:
تعليقات الرسالة (Atom)
|
|
للإتــصـال
|
|
يا مرحبا بزوارنا
|
|
|
موقف محترم وعقلاني ونشكرك عليه... هذاك آش حبيت انقلكم في تعليقي متاع البارح.
براستوس
ايواه هكة نتافهمو
شوف محلاه كلام لعقل والرزانة
هذا اش حبيت يصير من الاول
تطرح المشكلة ويتم تناقشها واتخاذ قرار صالح ومتزن
مااخرجني عن وعي هو تتالي التدوينة بنفس التركيبة وبنفس الصيغة دون ترك فرصة للتحاور قال شنوة هاني ننسحب وماحاشتيش هذا ما اسميته بالمراهقة والصبيانية
كلنا ضد الي صار وكان المشرف على المدونة ينجم ينبه قاسم وتوفى لحكاية لواش الافلام متع الكوبوي والخيال العلمي
على شكرا شكرا لتفاعلك وليس لي ما اضيف
ربما نشكر قاسم زادة بفضلو تكتبو خمسة او ستة تدوينات على المدونة وصار نقاش
فقط كلمة اخيرة لك ولغيرك لا اقدس احد ولا ائتمر باوامر احد افعل فقط مايمليه عليا عقلي في نطاق علمي وتجربتي