يظهرلي لي في البلوقوسفار لتوّا لا تعلّمنا تجاوز اختلافاتنا الإيديولوجية، هاذي حاجة إيجابية نوعا ما وقتلي تجيب الحوارات و تبادل الأفكار، أما تتهلك و تفسد وقتلّي واحد منّا ينقّص مالتسامح متاعو. آنا لي قلقني ماهوش تدوينة غنوشية ولاّ غيرها، صحيح شي قابل برشة للإنقاد، أما مش أكثر من بداية "استحواذ" على مدونة جماعية بنشر عديد التدوينات "ورا بعضو"، شي لي يذكرنا بطريقة عمل بعض المدونين ذوي الألوان الزاهية. لي نعيبو على قاسم هوّا "استعمالو" للمدونة الجماعية، في كمية التدوينات و محتواها، أما كي تجي تشوف العيب مش عليه، خاتر ما تجاوز حتى قانون، للسبب الوحيد الّي ما عملناش قانون للمدونة الجماعية. أول حاجة، كارنا عملنا نص فيه التوجه العام متاع المدونة و حدودها، و ثاني حاجة كارنا عملنا قوانين صغيرة للنشر. مثلا كل مدون له عدد معيّن من التدوينات في الشهر له الحق نشرها، و ذلك لمنع استحواذ مدون واحد على الفضاء. و الحوار يتم عبر التعليقات كالعادة. نحاولوا ساعات مثلا نختارو موضوع ولاّ ثنين يكتبوا عليه المدونين الكل (بالإختيار بين الموضوع لول ولا الثاني ولاّ الثالث إلخ)، نحاولوا نعملوا "ستراتيجي" متاع "كومينيكاسيون"، نتفاهموا شنوّا نحبوا نقولوا و لشكون؟ بالطبيعة هاذا الكل في جو متاع حرية و مش في منطق متاع حجب ولاّ منع، خاتر أخيب حاجة تصيرلنا هيّا أنّا نولّيو "تنّين من كثرة محاربة التنّين" كيما يقول نيتشه. و بالطبيعة مانيش موافق اقتراحات زياد لي طلب أنو المدونين تستعمل أساميها الصحيحة، في المطلب هذا قلّة احترام لوضعيّة العديد (باش ما نقولش الأغلبية) و حتى فايدة عمليّة. نحترم اختيار عاشور، أرابيكا، و ولد بيرصة، و يظهرلي لعباد الكل تعرف الّي كان ثمة شكون باش يفهم رايهم راو آنا، أما نتصور كان نخمّوا بطريقة نفعيّة خير: بقاؤهم في المدونة أنفع من مغادرتهم، و لذا اتمنى لو طبقنا اقتراحاتي بعد تعديلها بآراكم و صنعنا جو متاع ثقة، يرجعوا المدونين الثلاثة هاذم لي يعزّوا على قلبي، و نبداو المغامرة هاذي بأكثر تنسيق و ذكاء، في جو استقلال و حريّة

عن:عياش مالمرسى على الساعة 12:08

التسميات:

بربي خويا عيّاش عندي ملاحظة نعتقد مهمة برشه ، ما كانش ثمة تنسيق أو اي اتصال من أي نوع ، يعني فعلا الانسحاب كان تلقائي و شخصي و مبدئي

و الأهم

كان تضحية بمشاركتنا باش ما نفرضوش راينا ،

واضح ؟

معناها لا قلنا فسخوا لا طردوا لا أعملوا قوانين