‎'تحرير‎‎' المرا في تونس جا بقرار بيروقراطي موش بثورة اجتماعية. موش ممكن نعتبروه جزء من الحركة النسوية العالمية

اهلا طارق، "تحرير المرأة جاء بقرار بيروقراطي"، اذا اعتبرنا ان الحزب اللي شارك اكثر في معركة "الاستقلال" ممثل في شخص بورقيبة هو نفس الحزب ممثل في شخص بورقيبة خذا القرار متاع "تحرير" المرأة وقتها انجمو انقولو تبعا للمنطق هذا ان "استقلال" تونس جا بقرار بيروقراطي زادا و ما يمكنشي باش نعتبروه جزء من حركة تحرر الشعوب. في رايي اذا القرار البيروقراطي بكون في الاتجاه الصحيح و ينصف طرف فهو مقبول و هذا اللي صار في نحرير المرأة في تونس، موش على خاطر القرار بيروقراطي نتراجعو للقرون الوسطى، صحيح اللي التحرر كيف يجي نتيجة نضال جماهيري يكون احسن لانو صعب اللتفاف عليه و التراجع فيه، و لكن هذاكا اللي صار في تونس، و نفهم اللي انتي تقصد مسألة العقليات اللي ما واكبتشي القرار، صحيح و هذكا مهمة قوى التحرر، اللي يلزمها تعمل على ابادة الفرق الكبير الموجود في تونس ما بين القانون و العقلية

فرررر فمة مبدأ بديهي في الدنيا: الحاجة إلي جاتك لإيدك وما عرقتش عليها تنجم تضيع منك في كل لحظة. والمرا إلي مافكتش حقها بإيدها ماتنجمش تفهموا قداش غالي الحق هذا. كل تغيير يجي مالدولة موش مالمجتمع تغيير هش ووقتي.

هذامن شيرة. من شيرة أخرى مفهوم الحرية النسوية إلي طبقتوا الإدارة في الخمسينات مفهوم فرانساوي يختزل تجربة ثقافية مختلفة ياسر على تجربة المرا التونسية في هاك الوقت (لاحظ إلي ماقلتش 'خير' قلت 'مختلفة'). هاكا علاش صورة المرا في كتبتنا ومسرحنا وأفلامنا لتوة مازالت حبيسة ثنائية "الدين أو الحياة"، الثنائية إلي الفيمينيزم الفرنساوي تبنى عليها.

بالنسبة للعقليات، نأكدلك إلي العقليات ذكورية في معظم دول العالم وماهوش فال تونسي. المشكلة موش وقتلي العقلية ماتواكيش القانون أما وقتلي القانون يفقد مصداقيتو وسلطتو(كيما في حكاية الزواج العرفي إلي حكات عليها هناني قال شنوا 'ربي قال'). يعني الخلل في المواطنة موش في العقلية.

بالنسبة لملاحظتك على حيثيات الاستقلال ـ عندي ما نقول في الموضوع أما خاطي التدوينة هاذي. ممكن فرصة أخرى نحكيو فيه.