|
الجمعة، فيفري 06، 2009
|
|
أيا يا سيدي ... عسلامة هاني جيت
ما فيبالكمش ؟ ما حكيتلكمش ؟ تي مش تونس – اللهم لا حسد- اتطورت تطور غير مسبوق في كسب رهانات البروموسبور و النوفي ؟ مش تونس قالك – خمسة و قرن غزال- ولات تضاهي في البلدان المتقدمة و قالك باراك أوباما ما يرقدش الليل ...خايف من التونسيين الوطنين
نقول و نعاود وطنين ... ما نحكيش عالبابوش بو مصة على غراري أنا و غرار أغلبية المدونين و الصحافيين الي هذوكم تنجمو تعتبروهم يا حياوانات يا شرذمة ضالة ... لا عاد ... تبعوني مليح ... راني نحكي على هاك الوطنيين الي تتقاس وطنيتهم بعدد تصفيقاتهم في الثانية ....قالك ... عين ما تضرهم ... زميمهم عمل رقم قياسي 30 تسفيقة في الثانية ... يا بو قلب ... أسرع من السينما ...غريبة... أنا كان سألوني نقللهم راهو تسفيقم ما يكون كان ... سينما ...
ايا سيدي هالجماعة ... وصل بيهم التطور الى حدود الماكارتيزم ...يعني في الخمسينيات في تاريخ الولايات المتحدة ...برافوا لولاد ... شوية تصفيق و ال اش وخمسين سنة نجيبوهم ...بحول الله
علاش نحكي عالماكارتيزم ... السيد صاحب هالمدونة ... عمل ليستة حاطط فيها أسامي مدونات ضالة و قالك "شرذمة من مبتوري الوجوه" ... و عمل بالمناسبة تصفيقتين و الا تلاثة للوكالة التونسية للأنترنات ...يطول في عمرها و يعطيها الصحة و قالك .... شد عندك و تنفس مليح قبل ما تقرأ : توة بديت نفهم علاش الوكالة التونسية للأنترنات تقوم بحجب بعض المدونات و ذلك ببساطة لأنها تخالف القانون الذي يمنع التشهير بالقذف و السب
يعني سمعتوشي مدون في العالم أجمع ... توصل بيه الوطنية متاعوا أنوا يقول ... ميسالش سكرولي فمي يا ناس بالحجب و كان تحبو زادة في الثنية تستبيحوا جسدي أو جسد واحد من عائلتي ..ما فيها باس ... هاي الرجولية و الا لوٌح
أيا يا جماعة ...هضموا ...هضموا ...الطق مازال جاي ...
Marchez … soufflez …. Marchez … soufflez
أسمع اش قالك :
هؤولاء المدونين (المدونين مش المدونون ...مش مشكل) لأسف تخلوا عن وطنيتهم ليجندوا أشباه مدوناتهم لمهاجمة مدونين شرفاء اختاروا أن يسخٌروا الانترنيت لاظهار وطنيتهم و الهتاف بصوت واحد (يموتوا على أحدية الصوت) "معا من أجل تونس, معا من أجل بن علي"
يعني الوطنية بالنسبة ليه هو هتاف معا من أجل تونس, معا من أجل بن علي ؟؟؟
أنا بش نجاوبك يا سيدي نقلك .. كان أنا الوطنية متاعي يقيسها جاهل كيفك عندوا ليستة في يده و ناصب العسة ... أنا نقلك خلي الوطنية متاعك عندك ...وقيد ..بالستيلو و الا بالفوتر و الا بالقلم ... (أهوكا أنا عطيتك الحرية)
قيد ...القوفرنور مش وطني ...و نقولها ...ماناش معا من أجل تونس و ماناش معا من أجل بن علي ... أنا يا سيدي ... وحدي من أجل تونس .. وما نيش معاك و ما نتشرفش باش نكون معاك
و ختاما ... بالله ماعادش تشلك شعراء عندهم ما يقولوا كيما أولاد حمد في تدوينة ما عندك فيها ما تقول ... و ننصحك ...نصيحة وسع ... أرجع للكوبيي كولي كيما أصدقاءك القزورديين ...قالوا ... أحب البلاد كما لا يحب البلاد أحد ...صباحا مساءا وقبل الصباح و عند المساء .... عند ؟ عند ؟ تتذوق انت الشعر ؟ عند ؟؟ عندك لسان تتذوق بيه و الا حاطط طرف كرذونة ؟ عند ؟ عند ؟ تي حتى في المعنى ماتجيش ...
شلكت أولاد حمد و شلكت الرئيس و شلكت التدوين و شلكت الحزب الدستوري
أنا في بلاصتك ربي عطاني زوز يديات ننصحك في عوض تصفق بيهم ..استعملهم للندب
و أندبهم أندبهم أندبهم ...عالمستوى |
|
عن:Gouverneur de Normalland
على الساعة
17:48
|
|
الاشتراك في:
تعليقات الرسالة (Atom)
|
|
للإتــصـال
|
|
يا مرحبا بزوارنا
|
|
|
ههههههههههه... يا قوفرنور تفلقت ضربة وحدة..
هههههههههههه اللّه يتولاّك يا قوفرنور فلقتني بالضّحك
بالاخصّ كي شدّيت في " عند ؟ " ما سيّبت هههههه فكّرتني لروحي كي نهبل على تلميذ مصتّك
قالك ولاد أحمد باش يشكي بيه ههه على حكاية عند المساء و زيد باش يطالب بحقو فلوس من كل واحد يكتبلو بيت من شعرو من غير ما يشاورو
تهاو لتوا ما عملولنا جماعة الوطنيين حتا تدوينة فيها تحليل لحاجة ... خرجوا من خطابات سيادة الرئيس باش يدخلوا لتخوين معارشينهم.. و بكلو كلام كيف الظلام.
:))))))
J'ai été parmi les blogs cités par cet "excellent" patriote :)
Je ne sais pas si je dois en rire ou en pleurer voilà ce qu'était ma réponse:
http://h-lifois.blogspot.com/2009/02/blog-post_05.html
ya gouverneur hathaka ktebha yjaweb fia 3ala tadwina 3malthalou ana ( http://talfza-bel-malwene.blogspot.com/2008/12/champignons-mauve.html ) ... w comme 3araftou chakhssian essayed hatha 3lach yemch w 3alech yji ... w kifeh mkhalbezha rachwa w machekel fel SONED ahawka za3ma za3ma 3tani massrouffiii !!! hihihihihihihihihihihihi ... ama kima 9al tare9 hek el mar ... "haya cherrrrrr 9alou ma3an !!" hihihiihih