|
الأربعاء، فيفري 11، 2009
|
|
ما نخبّيش عليكم و أنّي ساعات، كيف الفرططّو اللي يرجع للنار اللي تحرقو كيما يقول الجويني يرحمو، نطيح مونْك في اللغة الخشبية و ما نلقاش خير من تونس 7 نشرجي بيها الريزرفوار على ما ياتي...الحاصل هي هي و الربع ساعة لولا اللي بيها الفايدة فاتتني، قلت ميسالش لعل نخلط على حويجة وقتلي يلخصو العناوين...و إذا بي نرى الله يلطف بي و بيكم في راجل يتكلم و وراه خريطة ملونة بطريقة غريبة شوية...زدت ثبتت و إذا بيها خريطة حرية الصحافة في العالم...الساعة نحطّوا الأمور في إطارها اللقطة جات في وسط التقرير الخاص بزيارة ساركوزي للعراق...نرجعوا توة لموضوعنا...شنوة التسيب هذا؟ كيفاش تسمحوا في قناة وطنية مشهودلها بالريادة كيما تونس 7 باش تعديوا خريطة تخوّف محسوب بكلها حمرا في جرّة روسيا...لا و تونس ملونة بالأكحل جملة...ماناش ناقصين إشاعات نحنا...هاو راديو كلمة يدلل....هاو الطريق الجديد تحجزلو عدد...هاو الناصرية ما حبّوش يرخصولها...المطلوب مزيد اليقظة و إذا لزم ما عادش تتعاملوا معاه مراسلكم في بغداد تقولش عليه مستقصدكم...ما لقى حتى أريار بلان آخر...نحب نستغل الفرصة و نحيي جريدة الحدث اللي ماخذة بخاطر القراء متاعها و عاملة للأسبوع الثاني على التوالي تقرير على روبار مينار اللي ما عندو ما يعمل كان يمرج فينا و يشوهلنا في سمعتنا...لا و قلك هو اللي مكّن سيئة الذكر حسب تعبيرهم سهـ ام بن سـ درين من تجهيزات لبعث إذاعة بتونس بلا رخصة و بتجاوز كامل للقوانين. |
|
عن:Werewolf
على الساعة
08:56
التسميات:
|
|
الاشتراك في:
تعليقات الرسالة (Atom)
|
تي هانا احنا او الصومال كيف كيف؛ يا والله احوال
عندهم الحق "الحدث" كيف نازلبن على مينار و سهام بن سدرين ، جماعة RSF حاطين تونس بالأكحل ، لا أبيض لا أصفر لا أحمر ، أكحل ،و كاتبين situation tres grave
ما هوش معقول هاذوما ناس ما يحبوناش و يبالغو و حاسدينّا على النجاحات في أغلب الميادين