في قعدة حلوّة اقراولي حسابي، في كعبات نهار سبت مع الاحباب اقراولي حسابي ديما. عرس، ثالث، فرق، وطيه، بلية، ربوخ رايض، ربوخ فيه ضرب خنيفري مايسالش، اقراولي حسابي. ماتش كورة مع اكالغفّاصة مالحومة الفوقانية اقراولي حسابي، نلعب درجْ و نرتاح درجين، اما المهم اقراولي حسابي. كتيبة، اكتب وفسّخ، هاني معاكم بالجهيد.. واقراولي حسابي. عوّادة اقراولي حسابي، حتى ما فيهاش عود ميسالش اقراولي حسابي.. حاجتكم بانترنور متاع شطرنج، ساهل ياسر، انا نكذب من هوني وانتوما اقراولي حسابي من غادي. تحبوشي تعملو فنون تشكيل، اقراولي زادا حسابي، ما انخليش من روحي... مشية للبحر، اقراولي حسابي، في البطيخ والدلاّع ما تنساونيش، في البريك بالتن تنساوني راني نِدْوانْ و نْجيبْ ما عندي... اقراولي حسابي على بكري. تعملو مسرح، اقراولي حسابي، حتى مخرج ميسالش.. في عجّة بالمرڤاز مع كعبتين رُوجْ انا نقرالكم حسابكم... في ايامات ڤينيا اقراولي حسابي، ايامات فارغة معاكم، ضرب ومضروب ماو معاكم، بطالة كيف كيف، فلسة ماو من جملة الناس... يجيشي نهار وتتلزو تاكلو القطاطس، معاكم..
لواه انطول في امها الحكاية، اقراولي حسابي فاللي تحبو، في بلاصة في الجلاز زادا، كل شي الا في حملة التطبيسْ متاع "معا من اجل..."، في هذي ما نيش "معا"، ما تْعمْلوشْ علي راني انخليها بيكم. وفيما تبقى نُرمال، اقراولي ديما حسابي.

عن:ferrrrr على الساعة 13:38

التسميات:

نشااللّة تهبط قنبلة تفوّر الجلاّز قبل ما نرى هاك النّهار

تدوينة ممتازة يا فررررر (ماهو 5 "ر")

وهاني قاريلك حسابك

اللطف عليك يا ولادة أما صدقني البلاصة ماعادش ساهلة في الجلاز
:)))

Bravo, le prototype du Tunisien (standard) qui est toujours partant... sauf que ce prototype est partant même pour "ma3an men Ajl tounes".... toujours présent même s'il n'est pas concerné, l'essentiel c'est qu'on ne l'oublie pas, peu importe son résultat

باش نقرالك حسابك يلزمني نكون نعرف :
1 القراية
2- الحساب
وانا لاني طيارة لا في القراية ولا في الحساب
لكن نفهم في محبة الأحباب..؛-)

Bravo..

si on accepte tout cela le pas est facile à franchir pour ma3a....men

ولادة ... ههههه ... علاش ؟ اش عملولك مساكن ؟؟؟ ... ما يزّيهمش موته وحده ؟؟؟

شكرا للجميع كيف قريتولي حسابي في تعليق