مانيش باش نعمل محاضرة ولا نحلل ازمة الثقافة فقط هو استنتاج حيبت نشارككم فيه
توة الحاجة الي متفقين عليها الناس الكل انو فمة مجهود ودعم وتشجيع لكن وينوا الانتاج؟
توة مثلا في اي بلد اوروبية كل نهار اربعاء فمة بالقليلة بالقليلة 6 افلام جدد يخرجوا نهارتها في قاعات السنيما بخلاف لقدم وزيد في نهارتها تلقى اربع مسرحيات متنوعة مسرح الهواة والكوميدي والصامت والانواع الكل وماننساوش حفلات الغناء بين الشبابية والاوبراء وكافة الاذواق الاخرى زيد يستدعاوك صحابك على عشاء تي ماك تصيرلك تخمة ثقافة
صدقوني ساعات نعدي ساعة قدام سينما موش عارف نختار بين الجديد والقديم بين النسخة الاصلية مدبلجة بالفرنسية (فيها متعة غير عادية ) وبين النسخة الفرنسية وخلي عاد المسرح يبدا ديكور باللوح وبالقرمود والارضية لوح ودخان وضباب تقول ديكور فيلم وستارن (نعشق الجو هذاكة)وتلقاه الناس تقعد بعد العرض تحكي وتحلل وتكونلك فرصة تتعرف على عباد وتتبادال الافكار وتروح فرحان
كل حد يعيش كيما يحب ويمشي يتفرج في الي يحب وحد مايقلو علاش ولا كيفاش وشبيك؟
بعد هاالصورة الجميلة نرجعوا للواقع متاعنا
في تونس نعملوا فيلم في العام ومسرحية كل خمسة سنين
كيف يخرج فيلم لازم الناس الكل تمشي تشوفوا ؟؟؟ اي ملا لازم تحب يعايروك ؟متفهمش في الفن ؟ وفمة شكون حاطط على الفايس بوك هاني ماشي للفيلم اليوم اي شكون يمشي ؟؟ ومجموعات في انتظار العرض الاول واحد من غمراسن حاطط انو ماشي؟؟؟ هكة توة تحب تقنعني انك باش تعمل 500 كلم ماشي تتفرج في فيلم؟؟ اشبيه جاكسون هو عاود رجع؟ امشي واعمل تصويرة ولا زوز ومبعد اعطي رايك وقول عجبك كيف الناس الكل (عقلية الخرفان) وقدرني قدرك الله موش مهمة الرسالة موش مهم وين يحب يوصل المخرج ولا صاحب السيناريو المهم هاني مشيت وزيد الممثل هذاكة صاحبي لازم نمشي ،يجي منو هو؟؟
ممكن من كثرة فقر الساحة الفنية ولينا هكة
تي حتى المدونات تلقاهم اربع كعبات يخدمو في نفس لقلم ويعاودو في نفس لكلام ونفس المعبوكة؟ هكة علموكم؟ وينو النقاش؟ وينو التحليل؟ تي كيف نحسها تجارة لحكاية تي ماني نزعف (كيما قال عادل باققققرف اوي) ياخي هو التدوين علاش ازدهر؟ ماو خاطر ناس هواة بدون انتماء ويعمل نقد محايد من غير اي ربح ،تجي انت تحكم على خدامتك يهبطو نفس التدوينة ونفس لكلام هككة تعمل وتسلك امورك؟ لا غالط سيدي موش هكة اساليب التسويق الحديثة معلوماتك قديمة وجب تحديثها توا كيف تحب تبيع ولا تعمل اشهار لحاجة لازمك معادش تشلق برشة لانو لعباد فدت من الاشهار ولذا لازمو يكون مخفي ويوصل الفكرة كيمة كعبة كوكا في فيلم ولا ساعة يد ديور يعطيو نتيجة اكثر من انك تحطلى مقطع اشهاري في الفاصل تنتهزو لعباد باش تمشي تشرب كاس ماء
يزيونا عيشكم من يا اكحل يا اسود بمعنى لازم بالسيف يعجبني الفيلم ونعبر على اعجابي ماكنش راني حقود ومريض ومعتل ومنفهمش والخ من النعوت
صحيح تقلي برشة مشاو شافوه وتعب السنيما وحققت ارباح معقول امى اسال اي واحد شاف الفيلم اش فهم منو؟ اه فيلم ؟ فيلم شكون؟ اه تي اهوكة فيه اسامي كبار وفمة شسمو عجبني لحق ديما يعرف يمثل؟؟؟ باهي وشنية الرسالة ولا المقصد متع الفيلم؟؟ بهه
كيف تقلي صورت فلوس نقلك صحة وبالشفاء امى ماتقليش فن هادف ولا كيمة قالت واحدة الي احنا بصدد شهود عرض اول فيلم .fiction.في تونس اي نعم فاتتني لحكاية(ربي يفك غربتي ونولي نحضر حتى انا في امور كيما هكة )
كيف تقلي قاعات السنيما مكتظة بالعباد نقلك مكره اخاك لا بطل مابين فيلم عصابة حمادة وتوتو وبين فيلمك الاختيار ساهل
كلامي هذا كان رد للناس وخاصة الانونيم والعصفور الي هاجموا صاحب الراي المخالف لهنا واتهمه بالحقد وافرح انها تونس.
باهي نعمل اشهار حتى انا لروحي
النص الجاي باش يكون لفضح استاذ قزوردي
هنا يقول في كلام بذئ(شيء لا يليق بمربي) هاني عملتلو عملية جمع لتعاليقو وباش نهبطهم في تدوينة.

باش تقولولي اش مدخلك؟
نقلكم انو حاطط في الوصف متاعو (تونسي بالحق ) الحق تنبزت حسيت روحي طلعت مانيش تونسي بالحق

عن:3amrouch على الساعة 09:59

التسميات:

أنا سمعتهم يقولو أنو الشعب التونسي مازال ماهوش متثقف بما فيه الكفاية باش يفهم و يهضم أفلامهم. و قالك إلي الشعب التونسي ما عندوش ثقافة سينيمائية.

يعني تتدخل تتفرج في "ثلاثون" و إلا فيلم "هي و هو"، و يضربك الكبّي، و ما تفهم شئ، و زيد تتكونسا في مخّك و تتعقّد، موش خاطر الفيلم ما جاء شئ، لا قالك خاطر إنتي ما تتذوّقش.

تحديث :
بعد كلامي عن الكلام البذئي يظهرلي السيد التونسي بالحق موش كيفي انا طلعت مغشوش فهم روحو ومشى يجري فسخ التدوينة هههه ههه لكن هيهات هيهات عندي التعاليق باسمو ويهبطو عن قريب بحول الله
امى الحق بديت نمن بقوة الانترنات

أزمة الثقافة أم ثقافة الأزمة؟؟

هههههه
في الصميم ارتي
صحيح عندي نوعا ما ثقافة الازمة ديما موش عاجبني شيء

:-))) لا ما نحكيش عليك بالضبط أما عندي إحساس انو ثقافتنا الشرقية ما تنجمش تعيش دون ازمة..عندنا كم هائل من الدموع لازم نلقاولهم سبة(كسر السين) باش يخرجو هههة ..سألتني صديقة من خارج دائرتنا الثقافية :-) قتلي علاش في جل التلفزات العربية نشوف ديمة أما ناس تبكي أو نافورات المياه .. قلت لها تلك ليست مياه بل دموع ..ههههه

Wissem Tlili at 12:05, on 06 February
عمروش

بش نزكي كلامك ...صارت هنا عركة و شهود

http://www.facebook.com/home.php?ref=home#/note.php?note_id=59161936868&ref=mf

لمجرد أنه ناقد شاب عمل تحليل موضوعي و قال الي الفيلم ما عجبوش

ولاش حسد و نوايا خبيثة ...قريب بش يتهموه بالسحر ويحرقوه

Salut Amrouch,
tu parle de l'article écrit par ismael, si c'est le cas peux tu stp me l'envoyer sur mon e mail car je n'ai pas de compte facebook et j'aimerais vraiment le lire!!Transitword@gmail.com

Merci d'avance.

يا عمروش المرّة الجاية ماعادش تعطي رايك في الثقافة التونسية و خاصة السنماء التونسي. الحكايات هاذم يلزمك تخلّيهم "للنخبة المتثقّفة". يا خي أنا و حتى إنت شنِفهمو منو بربّي؟ و زيد ثقافتنا شرقية قالك، نعرفو كان نلوجو على الأسباب باش نبكيُو.

أنا الحق متاع ربّي ما بكيت كان على الأفلام التوانسة. عمري ما بكيت على فيلم شرقي، و لا حتى غربي.

أنا شفت على الفاسبوك واحد تونسي بكّاي (ثقافتو شرقيّة) قالك الدولة ماعادش يلزمها تعطي المنح للسنمائِيين التوانسة (و موش لازم ندخلو في الأسماء) قالك يزّي من التمنيِيك على الشعب و بفلوس الشعب زادة!

أنا نعذرو، خاطرو كتب البوست متاعو من بعد ما خرج من فيلم "هو و هي" و من غير ما كمّل تفرّج فيه بالطبيعة، و ماهوش الوحيد.

يا سي سفيان هنا مكان لابداء الرأي راهو موش العرك ..تنجم تعبر على رأيك ومن غير غش وتنرفيز..ردودك تذكرني بالمسلسلات التونسية حيث كل شخصيات المسلسل تتحدث بانفعال شديد غير مبرر..وكأن التمثيل يعني الانفعال وليس التفاعل ..وإنت زادة مطالب بالتفاعل وليس الانفعال..هذا إذا كان فهمت إلي إنت معني بكلامي،أما في الحقيقة كلامي موجه إلى عمروش..

"حيث كل شخصيات المسلسل تتحدث بانفعال شديد غير مبرر"

هذاكا مش منهم من السيناريوات البوحلّوق. و زيد خاطر الدولة تخلّص فيهم (قناة قزوردي: قق). و إنت ماك تعرف الحاكم يبطى في حكايات الفلوس و يمرج، هذاكا علاش هوما ديما على أعصابهم.

ya transit
il y a surment une erreur dans ton adresse je n'y arrive pas
This is an automatically generated Delivery Status Notification

Delivery to the following recipient failed permanently:

Transitword@gmail.com

Ya 3amrouch,je l'ai bien reçu, merci

توّ ما كمش باش تفيقو علا رواحكم وعلى الغلط الي تسوقو فيه : توّ في تونس في كل مكان القهاوي والجوامع متوفرة
1- القهاوي تملا وتفرغ من الصباح لآخر الليل
2-والجوامع ولات أكثر من المدارس ومجهزة بكل وسائل الراحة
آش تحبو ثقافة أزين وأرقى من هكا؟

sa7a 3amrouch, chnya loumour...

bon, il post mte3ik... lè ydha7ek lè ybakki!! mahou hakkeka 5ir milli n9oul 3jibni ysammiwni mounefe9, wela n9oul ma3jebnich ysammiwni 7asoud 7a9oud... donc 5allini seket...

ama illi 7abbit nes2lek 3lih, howa chnia mochkeltek m3a il statut mte3i??? je vois pas en quoi ca te dérange!!!

attention! ceci n'est pas un message agressif, c juste une question, une demande de précision, bech ken 3andik il7a9, il pratique hedhi matjich, nbattelha éna!!... ama juste a9na3ni!!